ភ្នំពេញ៖ ថ្ងៃសុក្រ ១៥កើត ខែអស្សុជ ឆ្នាំជូត ទោស័ក ពុទ្ធសករាជ ២៥៦៤ ត្រូវនឹងថ្ងៃទី០២​ខែតុលា ឆ្នាំ២០២០ ឯកឧត្ដម សួង ហេង រដ្ឋលេខាធិការ ក្រសួងសាធារណការ និងដឹកជញ្ជូន បានដឹកនាំក្រុមការងារជំនាញ ចូលរួមកិច្ចប្រជុំជាមួយក្រសួងសេដ្ឋកិច្ច និងហរិញ្ញវត្ថុ ដែលដឹកនាំដោយ ឯកឧត្តម​រដ្ឋលេខាធិការ ចាន់ សុធី ក្នុងក្របខ័ណ្ឌគណៈកម្មការអន្តរក្រសួងដឹកនាំការងារគម្រោង/កម្មវិធីអភិវឌ្ឍន៍ និងជួសជុល ថែទាំផ្លូវថ្នល់ ស្ពាន ផ្លូវដែក និងកំពង់ផែទន្លេ។ កិច្ចប្រជុំ​បានពិភាក្សាលើបញ្ហាសំខាន់ៗ ២ រួមមាន៖ (១)-វឌ្ឍនភាពនៃការអនុវត្តថវិកាជំពូក ២១ (គម្រោងវិនិយោគផ្ទាល់) និងជំពូក ៦១ (ការងារជួសជុល និងថែទាំ) ឆ្នាំ២០២០ និង (២)-ការរៀបចំផែនការគម្រោងសាងសង់ស្ពាន ជួសជុល និងថែទាំហេដ្ឋារចនាសម្ព័ន្ធផ្លូវថ្នល់ ស្ពាន ហរិញ្ញប្បទាន ដោយថវិកាជាតិ ជំពូក ២១ (គម្រោងវិនិយោគផ្ទាល់) និងជំពូក ៦១ (ការងារជួសជុល និងថែទាំ) ឆ្នាំ២០២១​៕