(ភ្នំពេញ)៖ ឯកឧត្តមនាយឧត្តមសេនីយ៍ នេត សាវឿន អគ្គស្នងការនគរបាលជាតិ បានបញ្ជាក់ថា នៅពេលកាមេរ៉ាសុវត្ថិភាពត្រូវបានបំពាក់រួចរាល់ មន្ត្រីនគរបាលចរាចរណ៍ នឹងអនុវត្តសាកល្បង ទៅលើការចាប់ល្បឿនយានយន្ត ដែលបើកបរលើសល្បឿនកំណត់។ ឯកឧត្តម នាយឧត្តមសេនីយ៍ បានថ្លែងថា៖ «កន្លែងណាក៏ដោយឲ្យតែមានសមត្ថភាពបំពាក់កាមេរ៉ាសុវត្ថិភាព បានយើងនឹងអនុវត្តសាកល្បង»។ ឯកឧត្តមបានឲ្យដឹងបែបនេះ ក្នុងពិធីប្រគល់-ទទួល ផ្ទាំងសញ្ញាចរាចរណ៍សម្រាប់គោលដៅត្រួតពិនិត្យការអនុវត្តច្បាប់ ស្តីពីចរាចរណ៍ផ្លូវគោកចំនួន ៣០០រនាំង នៅថ្ងៃទី២៩ ខែកក្កដា ឆ្នាំ២០២០។ បើតាមឯកឧត្តម ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន នៅពេលនេះ កាមេរ៉ាចាប់ល្បឿនយានយន្តត្រូវបានបំពាក់នៅផ្លូវជាតិលេខ៣ ចាប់ពីរង្វង់មូលចោមចៅ ទៅខេត្តកំពតចំនួន ១០កន្លែង។ ក្រៅពីកាមេរ៉ាសុវត្ថិភាពអចល័តទាំងនេះ ក៏នៅមានកាមេរ៉ា ចាប់ល្បឿនចល័ត របស់មន្ត្រីនគរបាល​ចរាចរណ៍ នៅតាមបណ្តាផ្លូវជាតិមួយចំនួនទៀតដែរ៕