ឯកឧត្តមទេសរដ្ឋមន្ត្រី ស៊ុន ចាន់ថុល ប្រធានគណៈកម្មាធិការគណបក្សក្រសួងសាធារណការ និង ដឹកជញ្ជូន បានស្នើឱ្យកិច្ចប្រជុំពេញអង្គនៃគណៈកម្មាធិការគណបក្សក្រសួង ពិនិត្យបេក្ខភាពជាស្ត្រី សម្រាប់តំណែងប្រធានក្រុមការងារយុវជនបក្សក្រសួងដើម្បីលើកកម្ពស់សមភាពយិនឌ័រនៅក្នុងសកម្មភាពការងារបក្ស រាជធានីភ្នំពេញ៖ ថ្ងៃច័ន្ទ ២កើត ខែអាសាឍ ឆ្នាំជូត ទោស័ក ព.ស ២៥៦៤ ត្រូវនឹងថ្ងៃទី២២ ខែមិថុនា ឆ្នាំ២០២០ ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន និងជាប្រធាន គណៈកម្មាធិការគណបក្សក្រសួងសាធារណការ និងដឹកជញ្ជូន បានអញ្ជើញដឹកនាំកិច្ចប្រជុំ ពេញអង្គ នៃគណៈកម្មាធិការគណបក្សក្រសួងសាធារណការ និងដឹកជញ្ជូន ដោយមានការចូលរួមពី សមាជិក សមាជិកាគណបក្សប្រជាជនកម្ពុជាក្រសួងទាំងអស់។ កិច្ចប្រជុំពេញអង្គនៃគណៈកម្មាធិការគណបក្សក្រសួងសាធារណការ និងដឹកជញ្ជូននេះ ផ្ដោតជាសំខាន់ លើរបៀបវារៈសំខាន់ៗរួមមាន៖ ការប្រគល់សេចក្តីសម្រេចទទួលស្គាល់សមាសភាពគណៈកម្មាធិការ រណសិរ្សសាមគ្គីអភិវឌ្ឍន៍មាតុភូមិកម្ពុជាក្រសួងសាធារណការ និងសមាសភាពលេខាធិការដ្ឋាន ពិនិត្យនិងពិភាក្សាការធ្វើវិសោធនកម្មលក្ខន្តិកៈគណបក្ស និងបញ្ហាពាក់ព័ន្ធក្នុងបទបញ្ជាផ្ទៃក្នុងគណបក្ស របាយការណ៍ សង្ខេបស្តីពីលទ្ធផលនៃការចុះត្រួតពិនិត្យសកម្មភាពការងាររបស់គណៈកម្មាធិការគណ បក្សមូលដ្ឋានទាំង ប្រាំបួន និងក្រុមការងារយុវជនគណបក្សប្រជាជនកម្ពុជាក្រសួងសាធារណការ និង ដឹកជញ្ជូន។ ឯកឧត្តមប្រធានគណៈកម្មាធិការគណបក្សក្រសួង បានសំណូមពរ និងជំរុញលើកទឹកចិត្តឱ្យក្រុមការងារ បន្តចុះជួបជាមួយបងប្អូនប្រជាពលរដ្ឋឱ្យបានញឹកញាប់ដើម្បីស្វែងយល់ពីទុក្ខលំបាក និងបញ្ហាប្រឈម របស់ពួកគាត់នៅក្នុងជីវភាពរស់នៅប្រចាំថ្ងៃ ដើម្បីឱ្យពួកគាត់កាន់តែមានការជឿជាក់លើការដឹកនាំរបស់ គណបក្សប្រជាជនកម្ពុជានៅក្នុងអាណត្តិបន្តបន្ទាប់ខាងមុខ និងបានស្នើឲ្យក្រុមការងារចុះមូលដ្ឋានទាំង អស់ធ្វើរបាយការណ៍អំពីសកម្មភាពចុះជួបប្រជាពលរដ្ឋឱ្យបានទៀងទាត់ផងដែរ។ ជាមួយគ្នានោះ ឯកឧត្តមប្រធានបានស្នើឱ្យអង្គប្រជុំពិនិត្យបេក្ខភាពជាស្ត្រីសម្រាប់តំណែងប្រធានក្រុមការងារយុវជនបក្សដើម្បីលើកកម្ពស់សមភាពយិនឌ័រនៅក្នុងសកម្មភាពការងារបក្ស ក៏ដូចជាដើម្បីផ្តល់លទ្ធភាពឱ្យស្ត្រីបានដឹកនាំនិងចាត់ចែងការងារយុវជន តាមប្រសាសន៍ណែនាំដ៏ខ្ពង់ខ្ពស់របស់សម្ដេចអគ្គមហាសេនាបតីតេជោ ហ៊ុន សែន ប្រធានគណបក្សប្រជាជនកម្ពុជា និងជានាយករដ្ឋមន្ត្រីនៃព្រះរាជាណាចក្រកម្ពុជា៕