ភ្នំពេញៈ រដ្ឋមន្ត្រី​ក្រសួងសាធារណការ​ និងដឹកជញ្ជូន​​ បានជំរុញឲ្យមន្រ្ដីក្រោមឱវាទទាំងអស់ខិតខំស្រូបយកជំនាញភាពជាអ្នកដឹកនាំ ដល់មន្ត្រីរាជការជាថ្នាក់ដឹកនាំក្រសួង​ ដើម្បីមានចំណេះដឹង​ និងសមត្ថភាពក្នុងការអភិវឌ្ឍក្នុងអង្គភាពរបស់ខ្លួន។ នៅថ្ងៃទី១១ កុម្ភៈ ២០១៩ លោក​ ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការនិងដឹកជញ្ជូននៃប្រទេសកម្ពុជា បានចាប់ផ្តើមរៀបចំវគ្គបណ្តុះបណ្តាលភាពជាអ្នកដឹកនាំ ដល់មន្ត្រីរាជការ ជាថ្នាក់ដឹកនាំរបស់ក្រសួង ក្នុងកិច្ចសហការជាមួយនឹងមជ្ឈមណ្ឌល Center of Asia Leadership Initiatives (CALI) ជាអង្គការអន្តរជាតិមិនរកប្រាក់ចំណេញ បង្កើតឡើងតាំងពីឆ្នាំ២០១៤ ក្នុងគោលដៅដោះស្រាយបញ្ហាសង្គមនិងតម្រូវនានានៅអាស៊ី តាមរយៈការស្រាវជ្រាវ ការអភិវឌ្ឍ ការបង្វឹក និងផ្សព្វផ្សាយជាដើម។ វគ្គបណ្តុះបណ្តាលស្តីពីភាពជាអ្នកដឹកនាំ «Adaptive Leadership: Leading Change for Organizational Renewal» នឹងត្រូវបានរៀបចំដោយមានការបណ្តុះបណ្តាលពីវាគ្មិន ដែលបានបញ្ចប់ការសិក្សាមកពីសកលវិទ្យាល័យ Harvard ចាប់ពីថ្ងៃទី១១ ដល់ ថ្ងៃទី១៦ កុម្ភៈ ឆ្នាំ២០១៩។ វគ្គបណ្តុះបណ្តាលទី១នឹងធ្វើឡើងនៅរាជធានីភ្នំពេញ ចាប់ពីថ្ងៃទី១១ ដល់ថ្ងៃទី១៣ កុម្ភះ ២០១៩ សម្រាប់មន្ត្រីរាជការជាថ្នាក់ដឹកនាំចំនួន៥០នាក់។ រីឯវគ្គបណ្តុះបណ្តាលទី២នឹងត្រូវធ្វើឡើង នៅខេត្តព្រះសីហនុ ចាប់ពីថ្ងៃទី១៤ ដល់ថ្ងៃទី១៦ កុម្ភះ ២០១៩ សម្រាប់មន្ត្រីរាជការជាថ្នាក់ដឹកនាំចំនួន៥០នាក់បន្ថែមទៀត។ វគ្គបណ្តុះបណ្តាលនេះត្រូវបានរៀបចំឡើងសម្រាប់មន្ត្រីរាជការជាថ្នាក់ដឹកនាំរបស់ក្រសួង ដើម្បីបង្កើននូវចំណេះដឹងផ្ទាល់ខ្លួន និងសម្រាប់អង្គភាពរបស់ខ្លួនលើជំនាញភាពជាអ្នកដឹកនាំ ក្នុងគោលដៅបង្កើតនូវគំនិតផ្តួចផ្តើមថ្មីៗ លើការបង្កើនប្រសិទ្ធិភាពការងារ ក្នុងអង្គភាពនិងសហគមន៍របស់ខ្លួន។ លោក​ទេសរដ្ឋមន្ត្រី ស៊ុន ចាន់ថុល បានថ្លែងសារទៅកាន់អ្នកចូលរួមថា “វគ្គបណ្តុះបណ្តាលនេះ គឺជាឱកាសដ៏កម្រក្នុងការពង្រីកនូវចំណេះជំនាញវិជ្ជាជីវៈផ្ទាល់ខ្លួន ព្រមទាំងផ្តល់ឱកាសដល់មន្ត្រីរាជការជាអ្នកដឹកនាំក្រសួង និងប្រទេសជាតិ ឆ្ពោះទៅកាន់ការរីកចម្រើន លូតលាស់បន្ថែមទៀត”។ លោក​ ស៊ុន ចាន់ថុល ដែលក៏ជាអតីតនិស្សិតនៃសកលវិទ្យាល័យ Harvard បានទទួលស្គាល់ផងដែរថា កម្មវិធីបណ្តុះបណ្តាលភាពជាអ្នកដឹកនាំ ដែលរៀបចំឡើងដោយមជ្ឈមណ្ឌល Center of Asia Leadership នេះនឹងផ្តល់ឱកាសសម្រាប់មន្ត្រីរាជការគ្រប់រូប ក្នុងការបើកចិត្តនិងរៀនអភិវឌ្ឍន៍ខ្លួនឲ្យទៅជាអ្នកដឹកនាំ ដូចដែលឯកឧត្តមធ្លាប់ទទួលបានបទពិសោធន៍សម្រាប់ចំណេះជំនាញផ្ទាល់ខ្លួន និងជំនាញវិជ្ជាជីវៈផងដែរ។ ស្របតាមក្របខ័ណ្ឌនិងវិធីសាស្ត្របង្រៀននៅមហាវិទ្យាល័យ Harvard Kennedy School of Government និងមហាវិទ្យាល័យ Harvard Business School វគ្គបណ្តុះបណ្តាលរយៈពេល៣ថ្ងៃ ទាំង២វគ្គនេះនឹងមានកិច្ចពិភាក្សាទៅលើករណីសិក្សាសំខាន់ៗ សម្រិតសម្រាំងពិសេសសម្រាប់ថ្នាក់ដឹកនាំជាន់ខ្ពស់ និងថ្នាក់កណ្តាលដែលបម្រើការងារក្នុងវិស័យសាធារណៈផងដែរ។ លោក​ទេសរដ្ឋមន្ត្រី ស៊ុន ចាន់ថុល បានលើកទឹកចិត្តដល់អ្នកចូលរួមទាំងអស់ឲ្យមានការតាំងចិត្តខ្ពស់ក្នុងការទាញយកនូវអត្ថប្រយោជន៍ពេញលេញ ពីវគ្គបណ្តុះបណ្តាលនេះ។ ឯកឧត្តមទេសរដ្ឋមន្ត្រី ស៊ុន ចាន់ថុលបានថ្លែងថា លើសពីជំនាញដែលបានបណ្តុះបណ្តាល មន្ត្រីរាជការជាអ្នកដឹកដឹកនាំរបស់យើងនឹងអាចទទួលបាននូវសមត្ថភាពដែលអាចឆ្លុះបញ្ចាំងពីគុណតម្លៃរបស់ខ្លួន គោលដៅជីវិត ព្រមទាំងកត្តាដែលជំរុញលើកទឹកចិត្ត ក្នុងតួនាទីជាអ្នកដឹកនាំផងដែរ៕